Online Jobs: வீட்டிலிருந்தே இணையம் வழியாக பணம் ஈட்ட 10 வழிகள்

“என்னைய வேலையை விட்டு தூக்கிட்டாங்க, வேலை வேண்டாம்னு எழுதி தந்துட்டு போக சொல்லுறாங்க, நான் வேலை செஞ்ச நிறுவனத்தையே இழுத்து மூடிட்டாங்க” – வேலை பறிபோனதை இவ்வாறான பலரும் கூறுவதை கேட்காதவர்கள் யாரும் இருக்கவே முடியாது.

முதலில் கொரோனா வைரஸ் பரவல் குறித்த அச்சத்தில் இருந்த பலரும் தற்போது அதனால் தங்களது வேலை பறிபோனதை எண்ணி அதிர்ந்து போயிருக்கிறார்கள்.

சுமார் இருபதாண்டுகளுக்கு முன்னால் கொரோனா போன்ற பெருந்தொற்றுநோய் வந்திருந்தால் உலகம் இவ்வளவு விரைவாக அதிலிருந்து மீள்வது குறித்து யோசித்திருக்காது அல்லது அதுகுறித்த தகவல்கள் கோடிக்கணக்கான மக்களை சேர்ந்திருக்காது.

கோவிட்-19 நோய்த்தொற்று பரவலை உலகம் நம்பிக்கையுடன் எதிர்கொள்வதற்கு முக்கிய காரணமாக அறிவியல் – தொழில்நுட்ப வளர்ச்சி இருப்பதை மறுக்க முடியாது.

இந்த நிலையில், சமூகத்தில் மிகப் பெரிய பிரச்சனையாக உருவெடுத்துள்ள வேலைவாய்ப்பின்மைக்கு தொழில்நுட்பம் எவ்வாறு உதவ முடிவும்? வீட்டிலிருந்தபடி இணையம் வழியே பணம் சம்பாதிக்க முடியுமா? அதிலுள்ள சிக்கல்களும், அபாயங்களும் என்னென்ன? உள்ளிட்ட கேள்விகளுக்கான பதிலை இந்த கட்டுரையில் காண்போம்.

இது சாத்தியமா?

வீட்டிலிருந்து புதிய வேலையை கண்டறிந்து பணியாற்றுவது சாத்தியமா என்ற கேள்விக்கு செல்வதற்கு முன்பு, உலகம் முழுவதும் தினமும் அலுவலகத்துக்கு சென்று வேலை செய்தவர்களில் கோடிக்கணக்கானோர் தற்போது வீட்டிலிருந்து பணிபுரிந்து வருகிறார்கள் என்பதை கவனத்தில் கொள்ள வேண்டும்.

கொரோனா வைரஸ் பரவலின் காரணமாக முதலில் பரிசோதனையின் அடிப்படையில் வீடுகளிருந்து செயல்பட ஆரம்பித்த கூகுள், ஃபேஸ்புக், ஆப்பிள் உள்ளிட்ட நிறுவனங்கள் தங்களது ஊழியர்கள் இந்த ஆண்டு இறுதிவரை தொடர்ந்து வீடுகளிருந்தே பணியாற்றுவார்கள் என்று அறிவித்துள்ளன.

“அமெரிக்காவின் உள்நாட்டு உற்பத்தியில் மூன்றில் இரண்டு பங்கை தற்போது வீடுகளிருந்து பணியாற்றுபவர்களே பூர்த்தி செய்கிறார்கள்” என்கிறார் ஹார்வர்ட் பல்கலைக்கழகத்தை சேர்ந்த பொருளியல் பேராசிரியரான நிக்கோலஸ் புளூம்.

அதாவது, ஏற்கனவே இருக்கும் பணியை வீட்டிலிருந்தே செய்வது சாத்தியமெனில் புதியதொரு பணியை கண்டறிந்து சம்பாதிப்பதும் சாத்தியமே என்கிறார்கள் துறைசார் வல்லுநர்கள்.

எனவே, முதலாவதாக வீட்டிலிருந்தபடி, இணையம் வழியாக சம்பாதிப்பதற்காக 10 வழிகளை தெரிந்துகொண்டு பின்பு அதிலுள்ள சிக்கல்களை தெரிந்துகொள்வோம்.

இணையவழியே பாடம்/ மொழி கற்பித்தல்:

கொரோனா வைரஸ் பரவலின் காரணமாக பலருக்கும் வேலைவாய்ப்பு பறிபோயிருப்பது உண்மைதான். ஆனால், இந்த காலத்தை உபயோகமான வழிகளில் செலவிடுவதற்கும் பலரும் ஆர்வமுடன் உள்ளனர்.

எனவே, இதுபோன்ற சூழ்நிலையில் வேலைவாய்ப்பற்று இருக்கும் ஆசிரியர்கள், விரிவுரையாளர்கள், பேராசிரியர்கள், மொழியியல் ஆர்வலர்கள் உள்ளிட்டோர் இணையம் வழியே பள்ளி, கல்லூரி மாணவர்களுக்கு கணிதம், அறிவியல், பொருளியல், உயிரியல் உள்ளிட்ட பாடங்களை கற்பிக்கலாம். மேலும், வெளிநாடுவாழ் தமிழர்கள் மற்றும் தமிழரல்லாதோர் பலரும் தமிழ் மொழியை கற்றுக்கொள்வதற்கு ஆர்வம் காட்டி வருகின்றனர்.